अष्टागर नांदगांव

श्री गणेशाय नमः

नमस्कार मी अजित विनोद पंडीत, आलेवाडी. आपल्याला माझी पहिली पोस्ट आवडली हे तुमच्या प्रतिक्रियांवरून समजले. अष्टागरातील मंडळींनी खूप काही सकारात्मक करून ठेवले आहे मात्र ते लिखित स्वरूपात नाही,  कुठेच काही सापडत नाही, हे सगळे डोक्यात चालू असतानां आपणच का काही करू नये असा विचार मनात तरळला आणि मग केला श्री गणेशा. 

पहिली पोस्ट प्रकाशित झाली आणि तुमच्या शुभेच्छांचा वर्षाव सुरु झाला, बरीच माहिती तुम्ही सगळ्यांनी कमेंट करून, फोन करून दिलीत तुमच्या बहुमूल्य प्रतिक्रिया दिल्यात खूप बरे वाटले. ज्यांनी मला ब्लॉग साठी मदत केली त्यांचा मी ऋणी आहे. त्यांचा उल्लेख मी त्यांनी दिलेल्या माहितीच्या खाली नक्की करेन.

आपल्या अष्टागराव्यतिरिक्त इतर ठिकाणाहून सुद्धा शुभेच्छा आणि अभिप्राय आले आपल्या समाजातील बदलापूरचे श्रीयुत प्रकाशजी पांडे ह्यांनी सुंदर प्रतिक्रिया दिली आहे त्यांचे असे म्हणणे आहे की अष्टागरात आदरातिथ्य खुप छान केले जाते असा त्यांचा अनुभव आहे. मी आपल्या अष्टागरातर्फे त्यांचे आभार मानतो.

अष्टगरातील आपण सर्व गांवांवषयी जाणून घेणार आहोत आज आपण नांदगांव बददल माहिती घेऊयात.

नांदगाव Nandgaon:-

Nandgaon Beach नांदगांव  समुद्र किनारा

पालघर तालुक्यात अगदी अरबी समुद्राच्या कुशीत विसावलेले हे सुंदर गाव. नांदगाव चा पारनाका सोडला की रस्त्याच्या दुतर्फा ब्रह्मवृंदांची घरे आढळतात. जुन्या पद्धतीच्या  घरांच्या जागी आता नवीन घरे आढळतात, मात्र आजही काही जुनी घरे दिमाखात उभी आहेत. नांदगाव गाव म्हणजे प्रतीकोकण, नारळी, पोफळी, आंबे ह्या वृक्षांनी नटलेलं.  येथे आपल्या अष्टागरातील ब्राह्मणांची अंदाजे ६२ लोकसंख्या आहे. नोकरी व्यवसायानिमित्त काही कुटुंब परगावी असतात त्यांची अंदाजे लोकसंख्या २५ असावी. गावात राणे आणि जोशी ही कुटुंबे आहेत, जोशींचे गौतम तर राणेंचे गार्ग्य गोत्र आहे.  सफाळे एडवण येथील श्री आशापुरी माता राणे यांची कुलस्वामिनी असून जोशींची कुलस्वामिनी श्री महालक्ष्मी-कोल्हापूर आहे. 

येथील राणे कुटुंबात तीन तहसीलदार/मामलेदार होऊन गेले आहेत कै. जयवंत राणे, श्री विनोद राजाराम राणे व सौ वंदना विनोद राणे.  तसेच मुलगी डॉ. जाई विनोद राणे डेंटिस्ट आहे. येथील शिक्षक मंडळी आजही लोकांच्या स्मरणात आहेत. येथील काही मंडळी राजकारणात सक्रिय असून नोकरीत उच्चपदावर कार्यरत आहेत. पौरोहित्य, शेती तसेच नोकरी व्यवसाय येथील मंडळी करताना आढळून येतात. नोकरी निमित्त परदेशातही काही मंडळी वास्तव्य करून आलेली आहेत.  सरपंच, ग्रामपंचायत सदस्य, तसेच तंटामुक्ती अध्यक्ष व सदस्य या समाजाने गावाला दिले आहेत पुरुषांसोबत येथील स्त्रियांचा यात वाटा आहे. येथील श्री अजित शरद राणे हे कॅम्लिन लिमिटेड येथे उच्चपदस्थ आहेत.

येथील कै. श्री वसंत राणे हे राष्ट्रपती पुरस्कार मिळालेले शिक्षक होते. गुरुजींना दिल्ली येथे खुद्द राष्ट्रपतींच्या हस्ते आदिवासींसाठी विशेष कार्य करणारे शिक्षक म्हणून पुरस्कार मिळाला होता. मला ही प्राथमिक शिक्षणात ते गुरु म्हणून लाभले होते, पाठ्यपुस्तकात सुलभता यावी आणि आपल्या परिसरात दिसणाऱ्या गोष्टी त्यात याव्या या साठी ते नेहेमी आग्रही असत. त्यांना नुकतीच काही महिन्यांपूर्वी देवाज्ञा झाली त्यांना भावपूर्ण श्रद्धांजली.

येथील पुरातन शंभू महादेवाचे मंदिर खूप लोभस असून श्रीयुत दांडेकर यांनी उभारले आहे. कोकणातील एखाद्या मंदिराची प्रतिकृती असावी असे हे मंदिर आहे. मंदिर कौलारू असून मंदिरात गणपती मारुती आणि पार्वती च्या मूर्ती देखील आढळतात. श्रावणी सोमवारी येथे भाविकांची मोठी रेलचेल असते, महाशिवरात्रीला येथील शिवलिंग पाहण्याजोगे असते खूप सकारात्मक ऊर्जा या मंदिरात मिळते. 

1शिवमंदीर नांदगाव

शिवमंदीर नांदगाव

महाभारतामध्ये उल्लेख असलेल्या सप्तकुमारिका माता नांदगाव च्या समुद्राकिनारी विराजमान झाल्या असून येथील समाजाच्या त्या आराध्य आहेत. देवींना अनेक नवस सायास केले जातात. तसेच ग्रामदैवता श्री नांदबा देवी यांस लाभली आहे.

राणे कुटुंबाची कुलस्वामिनी आशापुरी माता सफाळे येथील एडवण गावात समुद्रात वसली आहे, समुद्रात एका छोटेखानी बेटावर /टेकडीवर सर्वोच्च ठिकाणी गुहेमध्ये देवी  विराजमान झाली आहे. देवीचे मंदिर देखील खूप सुंदर आहे. या टेकडीवर देवी सोबत काही वृक्ष आहेत त्यांना येथील बोली भाषेत राजणीचे वृक्ष म्हणतात. आता देवी पर्यंत जाण्यासाठी सिमेंटचा मार्ग असून येथे विजेची व्यवस्था करण्यात आली आहे. राणे कुटुंबीय नेहेमी देवीच्या मंदिरासाठी सुखसोयी करण्यात तत्पर असतात. समुद्राला भरती असली की या टेकडी च्या चोहोबाजूने पाणी असते. अतिशय नयन रम्य ठिकाण आहे. 

2आशापुरी देवी मंदीर, एडवण

आशापुरी देवी मंदीर, एडवण

3श्री आशापुरी माता , एडवण

श्री आशापुरी माता , एडवण

4आशापुरी देवी बेट

आशापुरी देवी बेट

सौजन्य:- मला हा ब्लॉग लिहिण्यासाठी माझा मित्र बंधू सनी जोशी आणि आशिष जोशी यांनी बहुमूल्य मदत केली आहे दोघांचे आभार, आशापुरी देवीचे फोटो कीर्ती आणि धीरज वैती यांच्या सौजन्याने.

आपल्या प्रतिक्रिया खाली टिपण्णी वर क्लिक करुन दया.

वाचा केळवण

वाचा देव देवक

गहू टिपणे प्रथा

अष्टगरातील साखरपुडा

अष्टागरातील कुंकू लावण्याची प्रथा,

अष्टागरातील खाद्यसंस्कृती,

अष्टागरातील शब्दप्रचार,

अष्टागरातील दिवाळी 

अष्टागरातील होळी

आठवडा 

वाचा कुलस्वामिनीअष्टागराच्या

वाचा नवान्न पौर्णिमा 

वाचा वेढी बद्दल माहिती 

वाचा नगावे बद्दल 

वाचा आलेवाडी बद्दल माहिती

वाचा नांदगाव बद्दल माहिती

वाचा टेंभी बद्दल माहिती

वाचा सरावली  बद्दल माहिती

वाचा बहाड बद्दल माहिती

वाचा पोखरण बद्दल माहिती

वाचा अष्टागर प्रस्तावना