श्री गणेशाय नमः
नमस्कार, मी अजित विनोद पंडीत आपल्या अष्टागर लेखमालेत तुमचं सगळ्यांच पुनःश्च स्वागत आहे आपण अष्टागरातील आरत्यांबद्दल माहिती करून घेत आहोत मागच्या लेखात आपण "स्थापीत प्रथमा" या गणेश आरतीला उजाळा दिला होता. आज आपण गणपती बाप्पाच्या "दिनदायाळा गणपती स्वामी" या आरतीवर प्रकाश टाकणार आहोत.
आपल्या "स्थापित प्रथमा" या आरतीची किंवा आपण नेहेमी ज्या संत रामदासांच्या आरत्या म्हणतो त्यांच्या चाली खूप सोप्या आहेत मात्र आजच्या आरतीची चाल थोडी कठीण आहे. मात्र आरती श्रवणीय आहे. ही आरती म्हणायला नेहेमी पेक्षा जास्त व्यक्ती असल्या की आरती म्हणायला मजा येते आणि सोपेही जाते.
दीनदयाळा गणपति स्वामी द्यावी मज भेटी। तव चरणांची सखया मजला आवडी मोठी॥धृ.॥
कवण अपराध म्हणवुनि देवा केला रुसवा। अहर्निशी मी हृदयी तुझा करितसे धांवा ॥ दीन.॥१॥
चिंताकूपी पडलों कोण काढील बाहेरी। धांवें पावें सखया करुणा करुनि उद्धरी॥ दीन.॥२॥
ऐसे होते चित्ती तरि का प्रथमचि देवा। अंगीकार करुनि केला कृपेचा ठेवा॥ दीन.॥३॥
आतां करणें त्याग तरिही स्वामी अघटित। शरण आलों माझा आता चुकवी अनर्थ॥दीन.॥४॥
यादवसुत हा विनवी दोन्ही जोडूनियां कर॥ तव चरणाचा सखया मजला आहे आधार॥दीन.॥५॥
ह्या आरतीच्या माध्यमातून कवी यादवसुतांनी श्री गणेशाला आर्त विनवणी केली आहे, हे दिनांच्या दयाळा मला येऊन भेट, हे सखया तुझे दोन्ही चरण मला खूप प्रिय आहेत. माझ्या हातून असा कुठला अपराध घडला की तू मजवर रुसला आहेस. मी मनापासून हृदयातून तुझा धावा करतोय. मी मोठ्या चिंतेत आहे त्यातून मला बाहेर काढ गणराया. माझ्यावर दया कर आणि माझा उद्धार कर. मी तुला शरण आलो आहे या संकटामधून मला बाहेर काढ आणि माझ्यावर ओढावलेला हा अनर्थ टळू दे. देवा तुझ्या चरणांचा मला खूप मोठा आधार आहे, माझे दोन्ही हात जोडून मी तुला विनवणी करतो आहे त्याचा विचार कर.
किती सुंदर आरती आहे, नाही का? आजच्या कोरोना संकट काळात ही आरती अगदी तंतोतंत जुळते आहे, आपण श्री गणपतीला प्रार्थना करू की लवकर ह्या संकटामधून तू सर्वाना बाहेर काढ.
आरती स्थापित प्रथमा
